(كفر سعد ( اللوزي

فى يووووووووووم من الأيام وفى ساعه من الزمااااااااااان كان طلب أبويا من حلاوه أخويا الكبير أنه يروح دمياط باعته هناك مشوار فحلاوه قال حاضر ورايح يلبس قعدت
أنا زى الزنانه أزن :اجى معاك ياحلاوه اجى معاك
حلاوه:يابنتى هتتبهدلى انتى لوعارفه لوكنت رايح الصبح كنت أخدتك لكن أحنا باليل
أنا : ماتخفش عليا ياحلاوه ده أنا بميه راجل وفيها ايه ما تبهدل عادى وكلمتى المعتاده معدتش تفرق سيناء من سوريا كله واحد يعنى ايه اللى هيحصلى
حلاوه:أمرى لله بس فى ثانيه تبقى جاهزه
وخلاص جهزنا ورحنا نوقف توك توك
واحنا فى التوك توك
حلاوه : احنا نركب بقه شربين ومن شربين دمياط وكفر سعد دى فى الطريق لدمياط لان احنا باليل ومعاد القطر اللى بيودى لدمياط علطول
أنا : خلاص يااااامان أوك أنا معاك يابرنس
رحنا الموقف بتاع شربين علشان نركب وطبعا احنا رايحين نركب الساعه 9 مساءيعنى مفيش حد بيسافر شربين فى الوقت ده
لقينا مكروباص والناس وكأنها اختفت ومحدش عاد بيسافر شربين ماهو لازم الجين بتاع عائلتنا يشتغل
ركبت أنا وحلاوه
والمكروباص كله فاضى ربع ساعه لقينا واحد جاى
بينى وبين نفسى لسه فى أمل
الراجل افتكرناه رايح يركب طلع راح يجيب كيس نساه فى المكروباص
واحنا فى المكروباص افتكرت فى فيلم اللمبى لما أم عم بخ ماتت ومحدش كان فى الميتم والراجل اللى جاه بالغلط
اهو أنا كنت عاوزه أعمل فى الراجل اللى نسى الكيس زى اللمبى وعم بخ ماعمله فى الراجل اللى فى الفيلم
بس يالا خير استننا كمان ربع ساعه لقينا واحد جاه يركب
قلت الحمد لله بعدها بقه الناس بدوا يجيو والراجل قعد يحمل والمكروباص اتحمل الحمد لله
مش المكروباص هو المشكله لو على المكروباص تبقى سهله
حلاوه اتعرف على واحد كده محترم واحنا فى المكروباص الله يكرمه فضل معنا لحد ماوصلنا
داربينه وبين حلاوه حوار لذيذ
حلاوه: ماتعرفش كفر سعد يتوصل لها ازاى؟
الراجل : المكروباص دلوقتى هينزلنا فى شربين ومن شربين تركب لدمياط وأنت فى الطريق لدمياط قول لسواق كفر سعد
حلاوه :تشكر ياريس يا أبو الذوق
الراجل: العفو وبرده أنا هفضل معاك لانى شغلى هناك وأنا أصلا من بلقاس وعلطول بروح المشوار ده
حلاوه :وشغل الكريم ايه؟
الراجل : نقاش فبروح هناك اشتغل وانا دلوقتى رايح دمياط وهنزلك فى كفر سعد
حلاوه:تكرم يا أبو الجدعنه
نزلت أنا وحلاوه ومعنا الراجل
وركبنا أنا وحلاوه والراجل ميكروباص من شربين لدمياط
وبعدان واحنا فى الطريق
الراجل: للسواق معاك كفر سعد ياريس
السواق :ماشى
خلاص عند كفر سعد نزلت أنا وحلاوه والراجل هيكمل لدمياط
المشهد بالتفاصيل
محطه قطورات قاعد راجلين قدامهم براد وميه بتغلى
حلاوه:سلااااااموا عليكم
الرجلين فى صوت واحد : وعليكم السلااام
حلاوه :ماتعرفش يامعلم فين بيت الاستاذ احمد الجميل
ده اسم الراجل اللى رايحين له
الراجلين:لو كنت تقدم خمس دقايق كان أبنه هنا قاعد معنا هو بيته فى اللوزي وأحنا فى كفر سعد تركب بقه توكتوك وتقله اللوزي تسال هناك أى حد عن بيت احمد الجميل
حلاوه: خلاص تشكروا ياذوق
واحنا فى حته مقطوعه على الطريق مفيش تكاتك ولا أى حاجه حقيره تتركب علشان كده أنا عندى عقده ولازم أشترى توكتوك
الراجلين :ياكابتن استنى نشوفلك تووك توك
فضلنا مستنين والكلام ده الساعه 11
لسه هنروح للراجل وهنرجع تانى نفس المواصلات وياعالم هنلاقى توكتوك يودينا لبيت الراجل ولا ايه النظام
فضلنا مستنين بتاع كده خمساشر دقيقه مش لاقين توك توك فى الهو اللى احنا فيه واحنا بقه سامعين صوت الصراصاير وكده
الراجلين : انتوا بقه تاخدوها مشى لحد اللوزي لان مفيش توك توك هيعدى من هنا
حلاوه بتون محتاار مش عاااااااارف يعمل ايه: تشكروا يارجاله
الراجلين: مش طويل اوى عليكوا أنتوا هتفضلوا ماشيين علطول لحد ماتلاقوا شركه الميه
وتسيبها وتحود على شركة الكهربا تلع منهم ع اللوزي هتلاقي الدنيا منورة
حلاوه:خلاص ماشى
حلاوه :ها ااااا خلاص بقه هناخدها مشى
وبينه وبين نفسه شايف الطريق كله ظلمة مع ان في اسم شركة كهربا عدى علينا
النور قاطع هناك ولا إيه؟
أنا :أوك عادى ولايهمك وراك رجاله نهارك أبيض
المشهد
شارع متسفلت على الحنب اليمين اراضى زراعيه والجنب الشمال عموايد نور كله مش منور بعضها
فضلنا ماشيين علطول علطول ولا حد ماشى فى الشارع الساعه12 بليل
سامعين صوت زن الصراصير اللى فى الاراضى الزراعيه
فضلنا ماشيين ماشيين بتاع كده2كيلو على رجلنا
وأنا اصبر نفسى وأعمل كده بنيه رضا الوالدين
معلش كله بثوابه
واحنا ماشيين طلع علينا كلب
طبعا أنا مش عاوزه اجرى علشان الكلب مايجريش ورايا
حلاوه:أثبتى ده كلب لونه أبيض يعنى طيب
أنا :قلتله بس كبير يعنى متوحش
حلاوه: احنا هنمشى ولا كاننا واخدين بالنا اتفقنا
أنا : اتفقنا ما هى الليله لازم تكمل
الحمد لله عدينا من عند الكلب بسلام
واحنا ماشيين كان ورانا راجل ماشى معنا طول الطريق طول مانمشى يمشى ورانا
أنا من جوايا مرعوبه ممكن يضرب حلاوه حلاوه يقع على الأرض مفرفر ولا حد هيسمعنا لاننا فى هو مفيش ولا شخص
ويخطفنى ويطلب من أهلى فديه كبيره وأهلى مش معهم فلوس يعنى هضيع هضيع ولا يسقينى حاجه اصفره
حلاوه: ماتخفيش انا معاكى وكمان ده أحنا بعيد عنه مش نبين له ان احنا خايفين لانه مش هيعمل حاجه
أنا : طيب ماناخدها جرى
حلاوه: لاكده هيعرف ان أحنا خايفين وحتى لو مكنش ناوى يعمل فينا حاجه هيعمل لما يشوفنا هبل كده
أنا : كلامك كله حكم ياحلاوه بس سرع رجلك
والحمد لله وصلنا لشركه الميه لقينا هناك عسكرى كده قاعد
حلاوه: سلااااموااااا عليكوااااا ماتعرفش ياريس فين بيت احمد الجميل
العسكرى:افضل ماشى علطول هتلاقى هناك خطاط هو البيت اللى جمبه
بعد ماخلص حلاوه كلامه مع العسكرى
أنا : أحنا لسه هنمشى كمان
حلاوه:بس كويس ماعدش حاجه وكمان هنا فى ناس مش زى اللى فات ونور كمان معتش حاجه
أنا :أوك يابرنس
خلاص الحمد لله وصلنا للخطاط لقينا البيت اللى جمبه مكتوب عليه احمد الجميل
طلع الراجل وكان شكله مش جميل خالص
فكرنى ساعتها حلاوه بفيلم عيال حبيبه لما كانوا رايحين لصباح مستورد ورامز جلال وهو بيقول ممس وصحبته
الراجل : اهلا اتفضل
بس كانت بعذومه مركبيه
حلاوه : لا شكرا ياريس بس علشان لسه هنسافر النهارده
الراجل: يا احمد يا احمد
ينادى على ابنه بصوته ماشاء الله اللى يوقع الدهان من على الحطان
أحمد: ايوه يابا
الراجل :خليك واقف معهم لانى عندى ضيوف جوه فى البيت
أحمد: حاضر يابا
الراجل: استاذنكوا أنا بقه
حلاوه :براحتك ياحاج احنا خلاص ماشيين بس مستانين توكتوك
لان برضه مش معقول هنمشى اللى مشناه ده كله تانى
أحمد ابن الراجل بيطلب فى النوبايل بتاعه: ايوووووه انت فاضى دلوقتى معايا ناس معرفه عاوزك توصلهم بالتوك توك بتاعه
سواق التوك توك اللى بيتكلم فى النوبايل :لامش فاضى
عمرى ماشفت تكاتك بتتطلب فى الموبايل بس مش مهم
بعد كده بتاع نصف ساعه فى الشارع واقفين قدام بيت الراجل
من غير حتى مايجيب لنا كوبيه ميه
الحمد لله لقينا توك توك
سواق التوك توك: المشكله دلوقتى مش التكاتك المشكله انكوا ممكن ماتلقوش عربيه فى الوقت ده توديكوا شربين
حلاوه : ربنا يستر
وصلنا الموقف بتاع دمياط علشان نركب مكروباص من دمياط لشربين ومن شربين لبلقاس
الحمد لله ربنا عارف اننا اتبهدلنا والقلق اللى ابويا وأمى فيه وتنيب الضمير اللى هما حسوا باللى عملوا فينا
لقينا مكروباص ركبنا فيه
وصلنا شربين
هناك بقه السواقين اللى هناك قولنا انتوا دلوقتى مش هتلاقوا مكروباص يوديكوا بلقاس انتوا تركبوا للمعصره ومن هناك تركبوا مكروباص ب50قرش لبلقاس
رحنا المعصره وكان معنا ناس قولوا لحلاوه احنا نجيب عربيه هى هيها بتمن المكروباص بدل مانستنا عدت عربيه ركبنا
والحمد لله وصلنا بلقاس بعد بهدله
وادى المواصلات فى مصر
الحمدلله أنا حى انا حى ها ها ها أنا مش مصدق نفسى وفى الآخر أحب أقول أنا اللى جبت ده كله لنفسى
الحمد لله رجعنا بالسلامه
البيت